Kostir barnsburðar

·         Ánægð börn:  Börn sem eru borin meira gráta minna. Rannsóknir hafa sýnt að börn sem eru borin gráta að meðaltali 43% minna en þau sem eru það ekki.

·         Heilbrigð börn:  Rannsóknir hafa sýnt að fyrirburar sem eyða meiri tíma í örmum foreldra sinna þyngjast hraðar og eru hraustari en þeir sem ekki fá slíkan tíma.

·         Aukið sjálfstraust foreldra: Stór hluti þess að öðlast sjálfstraust sem foreldri er að geta lesið þarfir barna okkar. Að halda á barninu í burðarpoka hjálpar foreldrum að skynja betur hreyfingar og svipbrigði barnsins. Í hvert skipti sem barnið þarf ekki að gráta til þess að láta foreldrið vita að það sé svangt, leiðist eða er blautt, öðlast barnið meira traust á foreldrinu. Þetta styrkir mjög samband barns og foreldris og er sérstaklega áhrifaríkt fyrir mæður með fæðingarþunglyndi/depurð.

·         Ástrík tengsl: Burðarpokar/sjöl eru frábær leið fyrir feður, ömmur og afa, ættleiðingarforeldra, barnfóstrur og aðra til þess að hjálpa til við að mynda ástrík tengsl við barnið. Barnið verður vanara rödd þeirra, hjartslætti, hreyfingum og svipbrigðum.  Að kúra saman með góðan burðarpoka/sjal er dásamleg leið til þess að kynnast barninu og fyrir barnið að kynnast þér.

·         Þægindi: Með burðarpoka/sjali er leikur einn að gera það sem þarf að gera með báðar hendur lausar, án þess að vera truflaður af örvæntingarfullu barni. Það getur einnig hjálpað til þegar fleiri börn eru á heimilinu. Barnaburðarpokar eru einnig góðir til þess að nota með eldri börnum. Oft er þægilegt að þurfa ekki að burðast um með kerru og komast þar sem kerrurnar komast ekki. Að fara upp og niður stiga, í fjallgöngur og í ferðalög, t.d. í gegnum flugstöðvar, er leikur einn með banrið í góðum burðarpoka!

·         Öryggi: Barninu finnst það öruggt og þér finnst barnið öruggt. Barnið er öruggt í hlýjunni upp að foreldrinu. Foreldrið er öruggt um að barnið týnist ekki t.d. á fjölförnum stöðum.

·         Tímalengd: Það er mun auðveldara að halda á barninu í lengri tíma í góðum burðarpoka en án hans.

Barnsburður og rannsóknir á því sviði

Margir sérfræðingar hafa bent á kosti barnsburðar, bæði fyrir barnið sjálft og foreldrana. Hér bendi ég t.d. á niðurstöður rannsókna Mariu Blois MD,  “Birth: Care of Infant and Mother: Time Sensitive Issues”, þar sem hún fjallar um barnsburð. Þar skiptir hún barnsburði upp í þrjá flokka, svokallaðan kengúruburð (ber burður, skinn við skinn), barnsburð í örmum og barnsburðar í burðarpoka/sjali.

Kostir kengúruburðar hafa mest verið rannsakaðir í kringum fyrirbura (börn sem fæðast eftir minna en 37 vikna meðgöngu). Það hefur sýnt sig að fyrirburar sem fá kengúrumeðferð (að liggja nakin upp að naktri húð foreldra sinna) á spítalanum útskrifast fyrr og fá síður sýkingar en þeir sem ekki fá slíka meðferð. Einnig gekk þeim betur að halda á sér hita, sváfu betur og grétu minna.

Að halda á barninu í örmum sér, í fatnaði og án burðargræja, hefur einnig góða kosti. Í einni tilraun sem gerð var árið 1986 af Hunziker grétu 6 vikna gömul börn sem fengu aukinn tíma í örmum foreldra sinna 43% minna í heildina og 51% minna á kvöldin.

Önnur tilraun var gerð með kveisubörn. Engin teljandi munur reyndist vera á gráti kveisubarna sem voru borin meira en þeirra sem voru borin minna. Þrátt fyrir þessar niðurstöður finnst mjög mörgum foreldrum best að halda á barninu sínu þegar það grætur og líður illa. Þá getur einnig verið gott að setja það í burðarpoka. Mögulega róar það barnið en í það minnsta tekur það álagið af foreldrinu af því að halda á því.

Árið 1990 gerði Anisfeld tilraun með mæður og mjúka burðarpoka. Sumar mæður fengu barnasæti eingöngu sem barnið fékk að leika sér í ákveðinn tíma á dag, og aðrar mæður fengu mjúkann burðarpoka til þess að bera barnið um í sama tíma. Mæður sem héldu á barninu sínu í burðarpoka reyndust eiga auðveldara með að skilja börnin sín.


http://www.babywearinginternational.org/Blois_research_summary.pdf

Fæðingarþunglyndi og burðarpokar

Burðarpokar/burðarsjöl geta minnkað álag á móðurinni. Börn sem borin eru í burðarpokum gráta minna og eru oft rólegri en það minnkar til muna álag á foreldra.
Burðarpokar geta aukið sjálfstraust móðurinnar í því að annast barnið. Kengúrumeðferðin sem notuð hefur verið með góðum árangri á fyrirburum á sjúkrahúsum hefur til að mynda sýnt sig að auki sjálfstraust móðurinnar og minnki líkur á fæðingarþunglyndi og depurð.

Einnig  ýtir barnsburður undir tengslin milli móður og barns. Með því að vera borin í burðarpoka fær barnið þá snertingu og nánd sem það þarf á að halda.

Einnig leyfir burðarpokinn/sjalið móðurinni að halda áfram að gera húsverk og önnur verk á meðan hún heldur á barninu.  Barnið situr þannig á öruggum stað á meðan hún hefur báðar hendur lausar.

Hægt er að fara í gönguferðir með barnið í burðarpoka/sjali í stað þess að nota kerru/vagn. Með því móti er auðveldara að ganga um hvert sem er, barnið fær nánd og móðirin fær útiveru og hreyfingu.

Dr. Kirkilionis hefur rannsakað þetta svið og skrifaði meðal annars bókina “A Baby wants to be Carried”. Þar mælti hún meðal annars með því að börn væru borin í M stöðunni/froskastellingunni.

Staða fóta barnsins (M staðan/froskastellingin)
Fætur barnsins ættu að vera í a.m.k. 90 gráðum, og meiga vera enn bognari. Þannig situr barnið í bestri stöðu. Þannig styðja Manduca og Beco pokarnir við læri barnsins þannig að rétt staða náist.

Bak burðarpokans/sjalsins
Bakið á að halda þétt um barnið þannig að það sitji vel upp að þeim sem ber það og barnið „leki ekki niður“ í pokanum.

Höfuð barnsins
Þegar nýfædd börn eru borin þarf að passa að burðarpokinn nái að halda alveg við höfuð barnsins þar sem þau hafa ekki enn sjálf náð stjórn á höfðinu.
Þegar barnið er orðið eldra er þetta ekki vandamál, en þó er gott að hafa höfuðstuðning þegar barnið sefur (líkt og hetturnar á Manduca og Beco pokunum).

Slæm staða barnsins
Sumir burðarpokar veita ekki nægan stuðning við fætur og bak barnsins.
Fætur barnsins eiga ekki að hanga beint niður, heldur þarf pokinn að halda við læri barnsins.
Í sumum tilfellum er fótum og hnjám barnsins þrýst upp að þeim sem ber það þannig að með hverju skrefi sem sá sem ber barnið tekur þrýstast hné barnsins aftur á bak. Þannig verður aukið álag á mjaðmir barnsins.

Slæm staða barns í burðarpoka:

Burðarsjöl

Burðarsjöl eru auðveldari í notkun en flesta grunar, og yfirleitt líður börnunum mjög vel í þeim. 

Burðarsjöl sem eru ein lengja sem bundin er utan um barnið og þann sem ber það

Þau eru af einfaldri hönnun. En það getur verið erfitt að finna efni í sjal sem tryggir rétta stöðu barnsins í lengri tíma.

Efnið verður að vera sterkt og gott. Það verður einnig að teygjast en ekki of mikið.  Ef efnið í sjalinu er of stíft og teygist illa þá er erfitt að binda barnið í sjalið þannig að það sitji rétt, og erfitt að binda hnúta. En ef sjalið er oft teygjanlegt getur hver hreyfing barnsins orðið til þess að sjalið haldi ekki lögun sinni.
Efni sjalsins verður einnig að vera þannig að auðvelt sé að binda hnúta og halda þeim. Ef efnið er er of gróft getur t.d. verið mjög erfitt að binda hnúta.

Þegar barn er borðin í burðarsjali er gott að hafa eftirfarandi í huga:

·         Þegar þú hefur bundið barnið í sjalið og tekið nokkur skref er gott að strekkja aðeins betur á því. Þannig að sjalið haldi algerlega við barnið.

·         Best er að hafa barnið frekar hátt þannig að þyngd þess sitji sem best á þér og þú finnir sem minnst fyrir því.

·         Einnig skiptir máli að hafa barnið sem næst sér. Þetta er einnig til þess að þú finnir sem minnst fyrir þyngd barnsins.

·         Ef sjalið er þannig að of mikið pláss myndast milli þín og barnsins verður það til þess að þú finnur fyrir þyngdinni eftir svolítinn tíma, og þá verður erfitt að bera barnið.

·         Að bera barnið framan á sér er erfiðara (líkamlega) en að hafa það á bakinu þegar barnið er orðið þungt. Ef þér finnst erfitt að bera barnið, eða ert að bera það í lengri tíma í einu, getur verið betra að hafa það á bakinu en á maganum.

Góð staða barns

Góð staða barns